رأي: خطوة برس
جاء في الاخبار.. مقتل (عريس) في امدرمان بطلق ناري أثر رصاصة أطلقها صديقه في يوم (حنة العريس)
وليست هذه الحادثة الأولى ولا التانية ولا الخمسين.. وما ح تكون الأخيرة طالما الناس مصرة تضرب سلاح في الأفراح ولم تجد العقوبة الرادعة لهذا الجرم وقد حدثت هذه الجريمة النكراء في كل بقاع الوطن الحبيب تارة في امدرمان؛ وثانية في الخرطوم وثالثة في مدني وغيرها في بحري واخري في القضارف وغيرها وغيرها في معظم مدن وقري السودان و في شندي ومعظم قراها (حيث دلوكة الجعليين والحماس منقطع النظير.
استجابت حكومة نهر النيل لمنشداتنا الكثيرة (كصحفيين) وفرضت عقوبات رادعة على كل من يضرب سلاح في الأفراح وكانت النتيجة (أفراح هادئة من غير سلاح وموت. ونشكر لها صنيعها هذا ونتمي ان تحذو حكومات الولايات الأخرى حذوها.
يا سادة يا قراء يا كرام يا كل اطياف المجتمع السوداني حكمو صوت العقل وانبذوا العادات القاتلة.. ( فيها شنو لو الزول دخل الحفلة دي من غير سلاح هو عارف روحو ما بتحكم في سلاحو ولو سمع زغرَودة بس تشيلو الهاشمية ويضرب وابل من الرصاص من غير ما يشعر) وتزهق روح او اثنين او ثلاثة…. عشان هو يعبر عن شعوره بالفرح ويكون جامل العريس… ياخ عاوز تجامل العريس ادفع ليهو قروش كتار والله دي احسن مجاملة مافي احسن من الكاش البقلل النقاش وخلي يزيعوك بالمكرفون واخد ليك عرضة وتبة وكدا انت بتكون ظهرت وجاملت العريس واشبعت غرورك بالظهور بدل الرصاص والموت والكتل.
زنبها شنو العروس فرحها يتقلب حزن وذنبها شنو ام العريس ولدها يموت قدامها وذنبهم شنو الناس الفي العرس كلهم يموتو من الخوف عشان ناس شايفة الفراسة في ضرب السلاح.
البلد ما ناقصة موت اصلا الناس ميتة بالحرب وميتة بالأمراض وميتة بالهجرة وميتة بالنزوح وميتة بالجوع فالله يرضي عليكم ما تزيدو هم المواطن على الهموم العليو.
نطالب السيد وزير الداخلية بتوقيع أقصى عقوبة على كل من يحمل سلاح في الأفراح في اي جزء من أجزاء الوطن الحبيب
كلام اخير
أفراح من غير
أفراح بلا سلاح
لا لحمل السلاح في الأفراح
اقصى عقوبة على كل من يحمل سلاح في الأفراح
